O mércores 29 de agosto tivo lugar a presentación do libro "O Castro de Zoñán" do arqueólogo mindoniense Abel Vigo. Este traballo recolle os resultados das escavacións realizadas entre 2002 e 2004.
Ao acto asistiron: o Alcalde de Mondoñedo, Orlando González; o Delegado Provincial de Cultura, Juan José Molina; o Xerente da Fundación Comarcal A Mariña Central, Manuel Valín e o Director Xeral de Patrimonio Cultural, Felipe José Arias. O Alcalde valorou moi positivamente o traballo de Abel e as escavacións realizadas no castro.

A finais de agosto, O Portal de Mondoñedo ofreceu unha completa reportaxe fotográfica sobre a instalación dos parques eólicos nos montes da Toxiza, o que está supondo a destrución de tesouros naturais como a Fraga Vella e "Os Castelos". [Ver fotografías]

O 31 de agosto foron eliminados os polémicos bolardos, instalados a finais de maio de 2006 para intentar solucionar os problemas do tráfico no centro.

O primeiro fin de semana de setembro, os veciños de Masma recuperaron a tradición das "caleiras" organizando a primeira edición da "Festa da Cal". [Ver fotografías]

Dende o día 4 setembro Mondoñedo dispón de cobertura da canle xeneralista "A Sexta" e doutras 3 canles máis (CUATROº, CNN+ e 40 Latino) a través da Televisión Dixital Terrestre (TDT). Desta forma, ampliouse a oferta de TDT en Mondoñedo que, desde fai dous anos, contaba unicamente coas emisións dixitais de dúas canles da TVG.

O domingo 9 de setembro celebrouse o día grande das festas patronais dos Remedios.
O Alcalde de Ortigueira foi o encargado de realizar a ofrenda na misa das 12 da mañá. A cerimonia foi cantada pola Coral Polifónica de Ortigueira e, unha vez finalizada a celebración, tivo lugar a procesión polo itinerario habitual, esta vez acompañada pola Banda Municipal de Ortigueira. As festas dos Remedios contaron con boas orquestras e co concerto de Marcos Llunas. [Ver fotografías]

A partir do sábado 15 de setembro comezou o servizo de Noitebús. Esta iniciativa cofinanciada polo Concello e a Consellería de Política Territorial Obras Públicas da Xunta de Galicia e Transportes facilita o desprazamento dos mozos de Mondoñedo a Ribadeo, todos os sábados e vésperas de festivos.

O 23 de setembro, algúns dos membros do movemento cultural “Ao carón dá lareira” e outras figuras do ámbito cultural como Francisco Pérez Porto, Couce Fraguela, Daniel Díaz Trigo, Assumpta Roura, Ramón Loureiro ou Fernando Ponte, ofreceron en Mondoñedo unha homenaxe a Manolo Montero, "Meigo Merlín".
O acto tivo lugar ás 12 da mañá na librería do mago, que cumpriu 50 anos desde a súa apertura. Manolo Montero, é protagonista de moitos libros de diversos autores. [Ver fotografías]

Un fallo no proceso de selado de dous tanques de combustible da gasolineira de Mondoñedo provocou que 200 litros de gasolina chegasen ao río Valiñadares a través da rede de rede de sumidoiros o 4 de outubro.

O 5 de outubro soubemos que o bipartito mindoniense deixaría de intentar que a Federación Galega de Espeleoloxía (FGE) retire os recursos xudiciais interpostos contra as obras no exterior e interior da Cova do Rei Cintolo. Con isto, tírase pola borda o proxecto de explotación turística elaborado polo anterior goberno local, que permitiría, segundo afirmaron desde o PP, combinar o aproveitamento sostible do recurso co respecto polo medio ambiente.

A principios de outubro, a organización ecoloxista ADEGA denunciou que a construción dunha minicentral afectaría negativamente ao río Tronceda. A realización desta minicentral suporía a perda do 90% do caudal do río, o que afectaría seriamente ás piscinas e aos saltos de auga da área recreativa da Fervenza. O 15 de outubro, os ecoloxistas convocarían unha reunión informativa para explicar, a particulares e colectivos de Mondoñedo, o estado da situación sobre a previsible instalación da minicentral no río Tronceda.

Tamén a principios de outubro, o mindoniense Marcos Méndez, co-director e co-produtor do curto "No armario", foi galardoado con dous premios no concurso Curtas na Rede. O primeiro dos premios é o de mellor curto da sección "Visións nosas, visións alleas" na categoría B (de 23 a 50 anos) e o segundo é o premio do público ao máis votado en curtas na rede.

O 18 de outubro, mindonienses e visitantes gozaron da espectacular feira de gando equino do día grande da edición 851 das San Lucas.
As feiras contaron coa presenza de autoridades do Concello de Ferrol, que conmemoraron o aniversario do irmandamento con nosa cidade, e o Conselleiro de Medio Rural da Xunta.
Na edición deste ano das San Lucas mantívose o número de postos instalados nas rúas, sobre 170, pero se reduciu considerablemente o número de cabezas de gando postas á venda na feira. De feito, todos os tratantes levaron o gando á feira en camións, perdéndose o tradicional paso de centos de cabalos a galope polas rúas do centro.
As festas contaron no concerto do grupo de folk "Luar na Lubre", exhibicións de deporte rural vasco, os Stihl Timbersports, un festival de baile rexional e grandes orquestras.
O 19 de outubro, a comida da terceira idade contou coa participación de máis de 500 maiores.
O 20 de outubro, o Vicepresidente da Xunta de Galicia visitou o centro de Servizos Sociais, onde avanzou os proxectos que teñen para a nosa cidade as Consellerías controladas polo seu partido. [Ver fotografías]