As Reliquias de San Rosendo, o patrón da cidade e da diocese de Mondoñedo-Ferrol, chegaron na mañá do 27 de outubro. O recibimento tivo lugar no Santuario da nosa Señora dos Remedios, alí esperaban os fieis e as autoridades eclesiásticas encabezadas polo Señor Bispo.
As reliquias estarían en Mondoñedo ata o domingo 28 de outubro. Ese día, ás 12:00h, celebrouse unha solemne eucaristía na Catedral presidida polo Señor Bispo. Finalizada a cerimonia, as Reliquias partiron de novo para Celanova.
[Ver fotografías]

O 3 de novembro, o congreso das literaturas galega, vasca e catalá chegou a Mondoñedo, onde, ás 12:00h celebrouse unha charla na Casa da Xuventude. O acto contou coa presenza de Xavier Gantzarain, Francesc Serés e Chus Nogueira. Ás 16.30 tivo lugar unha lectura de textos con: Medos Romeu, Marica Campo, Ramón Guillem, Jaume Mirò, Aritz Gorrotxategui, Rivadulla Corcón, Montserrat Rodés, Juan Ramón Makuso e Oier Guillan.

A primeira fin de semana de novembro, xusto logo da festividade de defuntos, uns vándalos romperon varias cruces de mármore, e outros obxectos, como floreiros e focos no cemiterio vello.
O Alcalde de Mondoñedo denunciou os feitos ante a Garda Civil e asociou estes actos vandálicos co botellón, ademais, indicou que están estudando a posibilidade de instalar un peche ao recinto.
As desfeitas no cemiterio xa se produciron noutras ocasións e xa foran denunciados por esta web.

Tamén a principios de novembro, asináronse en Santiago de Compostela os convenios de cooperación entre Concello, Xunta e Goberno Central que farán posibles novas obras de rehabilitación de inmobles no Casco Histórico de Mondoñedo. A execución destas obras requirirá un investimento de máis 453.000 euros, dos cales un 40% corresponderá aos propietarios dos inmobles.

A mediados de novembro, o historiador e deán catedralicio, Enrique Cal Pardo, publicou a documentación conservada no Tombo Pechado da Catedral de Mondoñedo.
Esta colección de documentos excepcional permite entender, mediante textos inéditos, a realidade da Igrexa galega nos últimos anos da época medieval.

O 17 de novembro celebrouse unha sesión de Polafía na Casa da Xuventude da nosa cidade. O acto contou coa presentación de Antón Reigosa, a narración de Elva Requeijo e a música de Antón Castro. [Ver fotografías]

O domingo 25 de novembro clausurouse o Ano Xubilar de San Rosendo cunha Eucaristía presidida polo Arcebispo de Santiago de Compostela, #Monseñor Julián Barrio. A 2 de Televisión Española restransmitiu en directo desde a Catedral Basílica de Mondoñedo o programa relixioso "El Día del Señor" para todo o país. O programa comezou cunha reportaxe sobre a cidade e o Ano de San Rosendo e continuou coa retransmisión da misa. A retransmisión puido verse en toda España excepto Cataluña.
[Ver reportaje]   [Ver resumen de la misa]

Durante a ponte da Constitución, unha delegación de Mondoñedo, encabezada polo tenente de alcalde Modesto Díaz e polo concelleiro Angel Díaz, viaxou a Tréguier co obxectivo de revitalizar o irmandamento con esta localidade bretoa.
Durante a visita tomaron contacto coa realidade da vida social de Tréguier e trataron diferentes asuntos para, nun futuro, realizar intercambios entre diferentes colectivos. 

O sábado 15 de decembro tivo lugar a segunda edición do Encontro de Corais que organiza o Orfeón da Sociedade de Obreiros de Mondoñedo.
Nesta ocasión, o festival non se puido celebrar no auditorio por problemas coa calefacción e tivo que ser trasladado ao salón de actos do I.E.S. San Rosendo.
O evento contou coas actuacións do Coro Mestre Pacheco de Mondoñedo, a Coral Renfe de Monforte de Lemos, a Coral Polifónica Alborada de Viveiro, o Orfeón Lucense e o Orfeón da Sociedade de Obreiros de Mondoñedo. Todas as corais participantes interpretaron temas do Nadal. [Ver fotografías]

Do 20 ao 22 de decembro, coincidindo co centenario da primeira interpretación do himno Galego, a cidade de Mondoñedo rendeu homenaxe ao músico Pascual Veiga, creador da música do himno. Ao longo dos 3 días houbo concertos, exposicións e conferencias sobre a figura do compositor.
A mañá do 22 de decembro tivo lugar a parte principal dos actos de homenaxe a Pascual Veiga nos que participou o Vicepresidente da Xunta de Galicia, Anxo Quintana.
O evento comezou ás 12:15h cunha ofrenda floral na tumba do insigne compositor mindoniense e, aínda no cemiterio, un gaiteiro interpretou a "Alborada", composta no ano 1880 por Pascual Veiga.
Acabada a ofrenda floral, as autoridades desprazáronse á Alameda dous Remedios onde se descubriu un busto do compositor, realizado por Juan Puchades. O acto finalizou coa actuación da Coral "Mestre Pacheco" e o canto popular do Himno. [Ver fotografías]